الشقه الجديده
=ماعرفش
-ازاي ماتعرفيش؟؟
= انا وعيي بالاحداث مرتبط بوعي البني ادم مابشوفش الا اللي بيشوفه والوعي المرتبط دا بينتهي بطلوع الروح،،
يعني ماعرفش الا شكلهم وانها اتد@بحت في حمامك لغاية ما طلعت الروح واتحررت انا عن الجسد وبعدت عنه ووعيي انفصل عن وعيه
لكن بعد كده عدى يوم والتاني والتالت والجسد ماندفنش ولا الجاني فكان لازم ارجع
-وانتي مين؟؟
ساعتها عينين بسنت لمعت وكأنها بتعكس النور وقالت
=ناس بتسميني شبح@ها وناس بتقول اني قرينها اللي بيتحرر بعد وفاتها وناس تانيه بتقول كيان اثيري طاقي
-طب انتي لفيتي حمامات المنطقه كلها ليه مادام وعيك كان موجود وهم بيخطفوها
ساعتها قامت من على السرير من ناحيته التانيه وبدأت تتحرك في الاوضه ببطء في اتجاهي وعينيها على عينيا في المرايه ووقتها حسيت ان صدى صوتها بدأ يتردد في الأوضه وكأنها بدأت تغضب وهي بتقول
-انت فاكرني بضلك؟؟! انا اخر وعيي واقتراني بيها انها كانت ماره جنب المنطقه بتاعتكم قبل ما تتسكن،، تقريبا كانت لسه بتتشطب،،وحست بحاجه نزلت على راسها ففقدت بعدها الوعي ولما صحيت كانت في حمام بيتشطب ومتكممه
واتناوبوا اغتص@ابها مرات ومرات وبعدها شق@وا رقبت@ها ساعة ما انتهى الوعي
-طيب وعرفتي ازاي ان حمامي هو اللي اتق@تلت فيه بعد ما رجعتي ولفيتي حمامات المنطقه كلها؟؟
كانت ساعتها قربت مني اكتر وهي بتقول=القت@ل بيسيب اثار عمرها ما بتتمحي،، بيسيب طاقات ماتحسوش انتوا بيها،، كنت بلف ليلة اكتمال القمر عشان الطاقات دي بتعلى فيها ولما كنت ادخل حمام وماحسش بطاقة القت@ل فيه كنت بسيب فيه علامة طاقه عشان مارجعلوش تاني
-واشمعنى الساعه واحده وخمسه
فشاورت بصباعها على رقبتها لما كانت وصلت جمبي وقالت=عشان دا الوقت اللي....
-طيب لو ماقدرتش اوصل؟؟
=قدامك لليله اكتمال القمر تاني بعدها دي اللي هتموت..
وشاورت بايدها على صدرها،، وبرقت بعينيها في عينيا وقالت= هتموت بالصرع
وساعتها حسيت ان بسنت بتتنفض ووقعت على الارض وفضل جسمها يتشنج ثواني كأنها في نوبة صرع وفجأه فقدت الوعي وهمدت على الارض فجريت شيلتها وحطيتها على السرير وبدأت أفوق فيها لغاية ما فتحت عينيها ببطء وبتقول-في ايه يا بابا؟؟
ساعتها حضنتها جامد وبدأت أبكي وانا حاسس بالعجز
وعلى مدار يومين كنت بعصر ذهني،، هلاقي اثر ازاي في الحمام اللي حصل فيه القتل قبل ما يتشطب دا
ماكانش عندي اي فكره ولا طرف خيط حتى،، عشان امسكه وكانت بدأت بسنت بدل الكوابيس اللي كانت بتقوم منها مفزوعه بدأ يحصلها ارتعاشات او هي اقرب للتشنجات بتيجي وتروح اثناء نومها..
في الوقت دا وكمحاوله يائسه كان طبيعي إني أقرر اروح شقتي وادور في الحمام يمكن الاقي اي حاجه وبدأت اروح كل يوم ابص في الحمام مش عارف انا بدور على ايه وكنت بدأت افقد الامل نهائيا اني الاقي حل لغايه ما في آخر يوم قبل اكتمال القمر..
قعدت بقلة حيلتي على طرف البانيو وبدأت اخبط بايدي على ركبتي واقول-هعمل ايه انا دلوقتي ؟!
هعمل ايه انا دلوقتي ؟!
لكن ساعتها حسيت بصوت حد طالع على السلم فطلعت ناحية باب شقتي لقيت البواب طالع فسألته-خير يا ابو شريف
