قصة شرايط العهد

_طب ماينفعش نعتبره بلاغ من مجهول مثلا

=ممكن حد مجهول يعمل اخباريه للمباحث بخصوص قضايا جاري التحقيق فيها عادي وساعتها لسلطات الضبط القضائي سلطة تقديرية في مدى جدية البلاغ ومدى امكانية بحثه

_يعني لو البلاغ دا اتعمل ممكن يتبحث على وجه الجدية

=ماتقلقش،،مع يقينك دا اكيد هيتبحث

_شاكر جدا لمعاليك يا فندم

خلال يومين رشاد عمل بلاغ من مجهول بكل اللي مليتهوله وتحقيقات النيابة بعدها ومن خلال المعمل الجنائي أثبتت وجود آثار خرابيش على حيطة وباب وشبابيك الأوضة اللي فوق السطوح وبالمعاينة أثبتوا إنها تخص القتيلة

مع عدم وجود أي علامات لكسر في الأوضة ممكن تهرب منه البنت ومع مواجهة الأم حاولت تنكر في البداية لكن مع المستجدات كان الخناق بيضيق عليها

خاصة لما كثفوا استجواب شهود من المنطقة افادوا كلهم ان ماحدش شاف البنت بقالهم فترة من آخر مره حاولت تهرب فيها

لا شافوها في الشارع طبيعي ولا وهي بتهرب وفي الأخير مرات الأب لما واجهوها بالتفاصيل اللي قالها رشاد في بلاغه بعد ما اتأكدوا من حقيقة الجزء الخاص بالحبس

اعترفت بالجريمة وأدلت ببيانات الشريك اللي اتقبض عليه

وفي آخر ليلة من ليالي الملاحظة ظهرتلي تاني

كنت عرفت اسمها

كان اسمها نور

كانت مبتسمة ومبسوطة

فقلت لها

_مشكلتك اتحلت،، وروحك هترتاح،، لكن انا هفضل في العذاب ده

=ومين اللي قال كدة

_انتي مش قلتي إنك لو كنتي تعرفي حل كنتي نفعتي نفسك

=أه دا لما كنت في العالم بتاعك لما كنت روح في جسد

_يعني ايه؟

=يعني انا اللي حركت الشرايط من الكيس اللي كنت انت حافظها فيه،، ساعة لما قلتلي مش عايز الاعيبكم دي،، ولما قربت عليها ولمستها انا اللي لفيتها حوالين جسمك كمان،، لان عمرها ما كانت هتصيبك غير لما تتلف حواليك

وقتها برقت عينيا

فكملت كلامها

=أول ماجيت عندكم المشرحة عرفت من همسات وهمهمات الأرواح الهايمة عندكم فيها انك انسان سلبي جدا على الرغم من الميزة اللي معاك..

ومن أول ما كلمتك إتأكدت إنك فعلا كدة

وكان واضح من قبلها إنك مرعوب من شرايط السحر وكان عندك حق في كدة لإنها من أشد انواعه فالحاجه الوحيدة اللي خطرتلي إني أحاول أشركك في مصيري وتشوف اللي أنا شفته يمكن تتحرك لكن بردو كنت سلبي حتى بعد ما اضطريت تسمع حكايتي عشان تعرف حكاية الشرايط فضلت على حالك وماسألتش حتى عن اسمي..

وكنت اقدر بعدها اظهرلك كل ساعة وكل يوم وماكانش يقدر يمنعني اللي مسّك،، لكن كنت سايباك يمكن كل ما تضيع اكتر تحس إن توصيل رسالتي مهم ليك وليا عشان تتأكد من حقيقية كلامي ومن حقيقة اللي جواك،،،لغاية ما وصلتها...

كنت لسه مبرق عينيا وانا بسمعلها لكن رديت

_المهم دلوقتي في حل ولا مافيش

=طبعا في

_ازاي

=اشباح المغدورين في العالم الموازي أقوى بكتير مما تتخيل،، خاصة لو كان كل اللي عايزه تعمله إنها تسترد حتة من كيانها

_مش فاهم

=الشرايط دي جزء من كياني وقت ما اتقتلت وانا اللي لفيتها حواليك وسكنتك اللعنة،، لكن حامل اللعنة مايقدرش يمنعني إني استردها من على جسمك لإني شايفاها،، غيرك انت لان سحرها مابيخليش البشر يشوفوها اول ما سحرها يسكن جسد اللي حاملها

_طب شيليها عني دلوقتي

=اصبر لما تخرج من هنا وفي اول ليلة هتنام فيها في سريرك هتصحى الصبح تلاقيها جنبك ومسئوليتك إنك تتخلص منها بلا رجعة لإن سحرها آخره حاجه من اتنين

يا تق،ـتل نفسك أو تق،ـتل غيرك،، يا اما عقلك يروح بلا رجعة

وصدق وعدها مع أول ليلة نمت فيها في سريري وفضلت من بعدها تتردد عليا لغاية اليوم اللي اتعدم فيه مغت،ـصبها ومرات ابوها اتحكم عليها بالمؤبد ومن بعدها ماظهرتش

لكن انا احتفظت بالشرايط

مش عارف ليه

يمكن احتاجها

او ممكن اعمل منها قميص

واسميه

قميص سحر شرايط الكتان

تمت